Tropellad ar chapelioù distro - Iwan Couée

Trugarez vras deoc'h evit toud ar pezh a embannit war ho plog. Dedennus-bras e vez bewech. Kizidik-tre e vez bewech. Ha bewech e vez laket war-wel ganeoc'h kenereoù ha kenheklevioù dispar etre arzoù liesseurt ha lennegezh. Evel rezon on bet fromet meur a wech gant ho soñjoù dudius diwar-benn ar pezh am boa bet skrivet, ha pa vefe barzhonegoù pe droidigezhioù. Pergen e-ser hoc'h evezhiadennoù nevez diwar-benn ar barzhoneg "Tropellad ar chapelioù distro".<br /> <br /> Evel a lavarit e vezer laket da ijinañ taolennoù ha skeudennoù diwar lenn ar barzhoneg-se. End-eeun, lod eus ar barzhoneg a oa bet diwanet em spered diwar un droiad vrav am boa bet graet er Vro-Fañch, diwar an traoù ken kaer am boa bet gwelet eno, ha pergen diwar weladenniñ chapel Sant-Anton en parrez Larruen. Ha just a-walc'h e vo kavet un menegig bennak eus Bro-Fañch er barzhoneg.<br /> <br /> Padal, daveennoù da lennegezh Vreizh a zo da gaout ivez e-barzh ar barzhoneg. Daveennoù ha n'int ket bet laket sklaer ha fraezh evel arroudennoù e penn ar barzhoneg.<br /> <br /> Da skouer, a-werso eo bet garanet em spered gwerzennoù Yann-Ber Kalloc'h "O doustér en overenneu én ur chapél, / Ur chapélig didrouz é mézeu Breiz-Izél ! ...".<br /> <br /> Skoet eo bet ma spered ivez gant un arvest dispar ha bamus bet deskrivet gant Pêr-Jakez Helias e-barzh "Marh al Lorh" (pp. 175-176), donedigezh Penmarc'hiz ha Tregennegiz, a-hed an aod hag a-dreuz an tevinier, a-dreuz an irvi-bili, pa oant prest da erruout e pardon Itron Varia Penhors: "Neuze e teu war-wel, tostoc'h ouzhomp, distag dirak an oabl war gribenn ar vilienn vras, ur rummad gwazed, merc'hed ha bugale all. Re Dregenneg. (...) Reizh-ha-reizh e kerzh ar birc'hirined ha war o zu kleiz e talc'h ar mor da zont da laez. Ur boutadig c'hoazh hag e sav un eil banniel, hag un trede. (...) Daoust d'an avel dibarfet ha da drouz boud al lanv, e klever drailhennoù eus kantik Sant Vio, kanet ganr re Dregenneg. Erruet dirak al loc'h, ar re-mañ a bign adarre, didrouz-kaer, war ar bili hag en em lak en-dro war-renk a-raok adkregiñ da vale war an hent meinek a gas d'ar chapel. Ha neuze e stagont (...) gant kantik Itron Varia Penhors".<br /> <br /> Hag evit gwir, un toullad bloavezhioù zo, em boa skrivet ivez ur barzhoneg all, "Emled" e dalbenn, ma raen anv ennañ eus chapel Lanc'hidou hag eus chapel Itron Varia Penhors.<br /> <br /> Koulskoude, an holl eñvorennoù-se, an holl varsoñjoù-se a zo aet tamm-ha-tamm da gemmeskañ kenetreze ha da gemmeskañ gant santimantoù all o tennañ da sevenadur Breizh.<br /> <br /> A galon, dalc'hit ganti !